Италияның Турин қаласында 14 қаңтар күні 2025 жылғы қысқы Универсиаданың ашылу салтанаты өтті, деп хабарлайды Ulyssport.
Қазақстан құрамасы бұл салтанатты ашылуға дайындықпен келді. Көп ел ту ұстаушылары кәдімгі спорттық киіммен шықса, еліміз ұлттық нақышпен көзге түсті.
Қазақстанның туын фристайлшы Аяулым Әмәренова мен хоккейші Абылайхан Сүлейменов көтерді.
Шеруден кейін Италия туын көтеру рәсімі өтті. Туды 2014 жылғы Олимпиаданың қола жүлдегері, мәнерлеп сырғанаушы атақты Каролина Костнер алып шықты.
Еске сала кетейік, 14 қаңтар 14:00-де спортшыларымыз үш спорт түрінен сынға түсіп, Универсиада ойындарындағы алғашқы жарыстарын бастайды.
