Бокстан Қазақстан ұлттық құрамасының бұрынғы капитаны, Токио Олимпиадасының қола жүлдегері Қамшыбек Қоңқабаев бокстағы мансабын аяқтады, оның орнына Айбек Оралбай келеді, деп хабарлайды Ulyssport.kz.
Бұған дейін ұлттық құраманың бас жаттықтырушысы Қайрат Сәтжанов пен Қызылорда облыстық спорт басқармасының басшысы Бақтияр Артаев та Қамшыбектің рингке оралуы екіталай екенін айтқан болатын. Енді бұл ақпарат расталып отыр.
Естеріңізде болса, Қамшыбек Қоңқабаев Париж Олимпиадасында жеңілгелі бері шаршы алаңға оралған жоқ. Қазір оның салмағында (+92 кг) Айбек Оралбай ел намысын қорғап жүр.
Қамшыбек Қоңқабаев Олимпиада жүлдесінен бөлек екі рет әлем чемпионатының (2017, 2019), үш рет Азия чемпионатының күміс жүлдегері (2017, 2019, 2021) атанған.
