Ербол Мырзабосынов Мемлекет басшысының берген тапсырмаларын сапалы орындау мақсатында Министрлік түбегейлі кешенді реформа жүргізу үшін нақты шараларды жүзеге асыруы қажет екенін айтты, деп хабарлайды Ulyssport.
БАСШЫЛАРДЫҢ ЖҰМЫСЫ КРІ-МЕН БАҒАЛАНАДЫ
Министр басқару вертикалін қалпына келтіру мақсатында өңірлік спорт басқармаларының басшыларын тағайындау тәртібінің өзгеретінін мәлім еткенбіз деп атап өтті.
"Оларды тағайындау Министрлік жанынан құрылған арнайы комиссияның келісімімен жүзеге асырылуда. Ұсынылған кандидаттар нақты талаптар бойынша бағаланады" деді министр.
ҮМІТКЕРЛЕР СПОРТ ҒЫЛЫМЫН МЕҢГЕРУІ ТИІС
"Үміткерлердің саладағы тәжірибесі мен даму жоспарының болуы, сондай-ақ олардың спорт ғылымының негізі мен менеджментін меңгергені ескеріледі. Бүгінгі таңда комиссия Павлодар, Қарағанды, Қызылорда, Батыс Қазақстан, Ұлытау және Ақтөбе облыстары бойынша кандидатураларға келісім беріп, 6 басқарма басшылары тағайындалды." деп жеткізді Мырзабосынов.
Бұдан бөлек, Ербол Мырзабосынов спорт федерациялары президенттерінің тағайындалуына бастамашы болып, кандидатураларын ұсынып, олардың қызметінің негізгі көрсеткіштерін айқындайтынын баса атап өтті. Сонымен бірге, құрама командалар үшін спортшыларды даярлайтын өңірлік дене шынықтыру-спорт ұйымдарын Министрліктің қарамағына беру бойынша жұмыстар жүргізілетінін ескертті.
