Шаңғы жарысынан Қазақстан құрамасының бас бапкері Александр Батяйкин Қытайдың Харбин қаласында өткен 2025 жылғы Азия ойындарын қорытындылады. Olympic.kz сайтына берген сұхбатында маман нәтиженің бірнеше негізгі жағдайға байланысты болғанын атап өтті, деп хабарлайды Ulyssport.
"Команда жарысқа тыңғылықты дайындықпен келді. Біз үлкен жұмыс атқардық және жоғары жүлделер үшін күресуге дайын болдық. Әлем кубогында кездескен жапондық басты қарсыластарымызды, сондай-ақ бізді жеңіп кеткен мықты қытайлық спринтер Ванды мұқият зерттедік.
Алайда басқа қытайлық спортшылар туралы ақпарат өте аз болды, себебі олар халықаралық жарыстарға қатыспаған. Медаль оңай жолмен келмейтінін түсінген едік.
Дәл солай болды. Бәсекелестік барысында Қытай құрамасы бізден мықтырақ екенін көрсетті. Осыдан үш жыл бұрын бұл елде Олимпиада өткенін ескерсек, олардың өз алаңында өтетін Азия ойындарына арнайы дайындалғаны анық. “Өз үйіңде қабырғалар да көмектеседі” дегендей, спортшылардың дайындығы өте жоғары деңгейде болды,"– деді бас бапкер.
Александр Батяйкин өткен Азия ойындарындағы жарыс бағдарламасының қысқартылғанын да атап өтті.
"Мұндай жарыстарда төрешілердің шешімдері жиі шешуші рөл атқарады. Қағидалар бірнеше рет бұзылды, бірақ кейбір сәттер елеусіз қалды. Біз екі жағдайда қарсылық білдіре алдық, соның нәтижесінде Борцов күміс медаль алды. Алайда Климин төртінші орынмен шектелді, ал әйелдер арасындағы спринтте Ряжко жүлдесіз қалды. Осылайша, біз екі қола медальдан айырылып қалдық, өкінішті.
Әрине, біз көбірек жүлде алғымыз келді, әсіресе алтын медальға жетпей қалдық. Бірақ спортта мықты жеңіске жетеді.
Тағы бір маңызды жағдай – жарыс бағдарламасы. 2011 жылы Алматыда өткен Азия ойындарында бағдарлама бізге ыңғайлы болды: ерлер мен әйелдерге алты-жеті дисциплина түрі енгізілді. Ал Харбинде тек үштен ғана болды. Біздің негізгі қаруымыз – классикалық стильдегі ұзақ қашықтықтағы жарыс мүлде өткізілмеді. Сондай-ақ командалық спринт пен тағы бір ұзақ қашықтықтағы жарыс болмады, ал бұл қашықтықтарда біз жақсы нәтиже көрсете алар едік.
Азия ойындары аяқталды, енді бізге жан-жақты талдау жасап, алдағы жұмысты жалғастыру қажет. Бізде болашағынан үміт күттіретін жас спортшылар бар, ал біздің міндетіміз – оларды тек Азиада ғана емес, әлемдік деңгейде де бәсекеге қабілетті атлеттер етіп дайындау," – деп қорытындылады маман.
Айта кетейік, Харбинде өткен Азия ойындарында Қазақстан шаңғышылары төрт медаль жеңіп алды. Константин Борцов спринтте күміс жүлдегер атанды, Олжас Климин 10 шақырымдық жарыста үшінші орын иеленді. Әйелдер құрамасы эстафетада күміс медаль алса, ерлер құрамасы қола жүлде еншіледі.
Жақын арада шаңғы жарысынан Қазақстан құрамасы Норвегияның Тронхейм қаласында өтетін әлем чемпионатына қатысады. Ол 26 ақпан мен 9 наурыз аралығында өтеді.
