Испанияда мадридтік "Реал" футбол клубының бас бапкері Карло Анчелотти салықтан жалтару ісі бойынша сотқа тартылды, деп хабарлайды Ulyssport.
АНЧЕЛОТТИ ҚАНДАЙ АЙЫПТАУҒА ТАП БОЛДЫ?
Испандық БАҚ мәліметінше, прокурорлар оны 1 миллион еуродан астам қаржыға байланысты алаяқтық жасады деп айыптап, төрт жыл тоғыз айға бас бостандығынан айыруды сұрауда. 2014 жылы – 386 мың еуро, 2015 жылы – 675 мың еуро салық төленбеген.
ҚАРЖЫЛЫҚ ҚҰПИЯ НЕДЕН ТҰРАДЫ?
Анчелотти өзін Испания резиденті деп көрсеткенімен, имидждік құқықтарды пайдалану арқылы алған табысын жасырған. Бұл құқықтар басқа ұйымдарға берілген.
БАПКЕР НЕГЕ КЕЛІССӨЗДЕН БАС ТАРТТЫ?
Анчелотти испан прокуратурасымен келісім жасаудан бас тартатынын және сотта өзінің уәжін ашық жеткізуге дайын екенін мәлімдеді.
АНЧЕЛОТТИДІҢ СОТТА АЙТҚАН СӨЗІ
"Мен ешқашан бұл істің заңсыз екенін ойлаған емеспін. Маған "Реал" имидждік құқықтарды тапсыруды ұсынғанда, өз кеңесшіммен сөйлестім және бәрі дұрыс деп санадым. Бұл алаяқтық болуы мүмкін деп мүлдем ойламадым", – деді ол сотта.
65 жастағы Анчелотти "Парма", "Милан", "Ювентус", "Наполи", ПСЖ, "Челси" және "Бавария" клубтарын баптаған. Ол 2013-2015 жылдар аралығында "Реал" бас жаттықтырушысы болды, ал 2021 жылы қайтадан мадридтік клубқа оралды.
