Каратэден (WKF) Токио Олимпиадасының қола жүлдегері Дархан Асаділов Қазақстан ұлттық құрамасына бас бапкер болып тағайындалды, деп хабарлайды Ulyssport.
Дархан Асаділов – кәсіби спорттағы көптеген ірі жетістіктерімен танылған тәжірибелі спортшы. Ол Токио Олимпиадасында (-60 кг салмақта) қола жүлде, әлем чемпионатының күміс (2008) және қола (2018) медальдарын, сондай-ақ Гуанчжоудағы Азия ойындарының алтын жүлдесін жеңіп алған. Сонымен қатар, Karate-1 Премьер-лига турнирінде 8 мәрте жеңімпаз атанған.
Бұған дейін Дархан Асаділов Шымкент қаласындағы спорт мектебінде және Қазақстан жастар құрамасында жаттықтырушы болып жұмыс істеген.
Дархан – қазақ каратэ өнерін жаңа деңгейге көтерген дара тұлға. Енді ол өзінің тәжірибесін, шеберлік мектебін ұлттық құраманың дамуына бағыттайтынына сенім мол.
Жаңа бас бапкер үшін алғашқы үлкен сынақ – мамыр айының соңында Ташкентте өтетін Азия чемпионаты болмақ.
Дархан Асаділовтің алдағы мақсаты – ұлттық құраманың бапкерлік құрамын қалыптастыру, Жапонияда өтетін 2026 жылғы жазғы Азия ойындарына дайындықты бастау және жоғары нәтиже көрсету.
