Олимпиада чемпионы Елдос Сметов Халықаралық дзюдо федерациясындағы (IJF) мансабын бастауы мүмкін. Бұл туралы Qazaqstan Barysy Grand Slam турнирі қарсаңында өткен баспасөз конференциясында ұйымның рефери-директоры Армен Багдасаров мәлімдеді, деп хабарлайды Ulyssport.
МӘЛІМДЕМЕ
— Елдос Сметов — көрнекті спортшы. Олимпиада чемпионы, ойындардың жүлдегері, әлем чемпионы. Біз оны өз командамыздың қатарынан көрсек қуанар едік. Мәселе мынада, өкінішке қарай, көп чемпиондар федерацияда жұмыс істегісі келмейді. Бірақ егер ол қызығушылық танытып, ағылшын тілін меңгерсе — бірден жауапты лауазымдардан бастаймыз. Мұндай адамдарға біз әрдайым ашықпыз, — деді Багдасаров Қазақстан дзюдо федерациясының баспасөз қызметіне берген сұхбатында.
СМЕТОВ
Елдос Сметов 2024 жылғы Париж Олимпиадасынан кейін спорттағы мансабын аяқтады. Қазір ол Ұлыбританияда, ағылшын тілін белсенді меңгеріп жүр. Бұл қадам оның халықаралық спорт ұйымдарындағы қызметке ауысуындағы маңызды кезең болуы мүмкін.
Сметов — Қазақстан тарихындағы ең атақты дзюдошылардың бірі: Олимпиада чемпионы, Олимпиада ойындарының күміс және қола жүлдегері, әлем және Азия чемпионы.
