Туризм және спорт министрі Ербол Мырзабосынов "Қайрат" - "Реал Мадрид" ойынына қатысты маңызды сұрақтарға жауап берді, деп хабарлайды Ulyssport.
Стадион салу
Мырзабосыновтың сөзінше, қазіргі уақытта жеті қалада стадион салу жоспарланып отыр.
- Жеті стадион бойынша сметалық құжаттар дайындалып жатыр. Бес өңірде жер учаскесін анықтап жатырмыз, – дейді министр.
Қанша турист келеді?
Сонымен қатар, Мырзабосыновтың сөзінше, ойын тамашалауға келе алатын адам саны бойынша УЕФА стандарттары бар.
- Келем деген адам келе бермейді. Өзінің квотасы бар. Квота бойынша 4 мыңға жуық адам деп отыр, – дейді министр.
Ербол Мырзабосыновтың сөзінше, билет бағасы әлі белгісіз. Бірақ клуб тарапымен келісіп, бағасы айтылатын болады.
- Ең бастысы билет сатып алатын жерлерді байқау керек. Халық алданып қалмауы керек. Қай уақыттан бастап билет сатып ала алатынын хабарлайтын боламыз, – дейді ведомство басшысы.
Ойын неге Астанада өтпейді?
Министрдің сөзінше, бұл мәселеге қатысты да арнайы стандарт бар.
- Алматыдағы стадион 4 категориядағы стадион. Инспекция толық өтті. Болашақта Астананы да қарастырамыз. Бірақ УЕФА стандарты бойынша Алматы стадионы таңдалды, дейді министр.
Матч қашан өтеді?
Айта кетейік, «Қайрат» – «Реал Мадрид» кездесуі бір айдан кейін, 30 қыркүйек күні Алматыда өтеді. Ал «Интермен» кездесу 5 қараша күні Миланда өтеді. «Арсеналмен» кездесу 2026 жылдың 28 қаңтарына жоспарланған.
