Шотландиялық «Данди Юнайтед» клубы Қазақстан құрамасының жартылай қорғаушысы Ғалымжан Кенжебекке қызығушылық танытып отыр, деп хабарлайды Ulyssport.
Courier Sport мәліметінше, «Юнайтед» қолайлы бағада лайықты нұсқа табылса, тағы бір вингерді қатарға қосуды жоспарлап отыр. Кенжебек олардың назарында тұрған футболшылардың бірі.
22 жастағы жартылай қорғаушы маусымның екінші жартысында «Елімай» сапында жарқырай ойнап, 11 матчта 6 гол соғып, 4 нәтижелі пас берген. Оның үлесі командаға Қазақстан чемпионатында төртінші орын алып, Конференциялар лигасының іріктеу кезеңіне жолдама алуға көмектесті.
Ұлттық құрама сапында 9 матчта 3 гол соққан Кенжебек алдағы Бельгия және Фарер аралдарына қарсы ойындарға Қазақстан құрамасының тізіміне енген.
Футболшының «Елімаймен» келісімшарты қысқа мерзімді, сондықтан ол еркін агентке айналуы мүмкін. «Данди Юнайтед»-тен бөлек, оған Португалия, Грекия және Чехия клубтары да қызығушылық білдіруде.
Бұған дейін Кенжебек «Қайрат», «Мақтаарал», «Қайрат-Жастар» және «Жеңіс» клубтарында, сондай-ақ Кипрдің «Акритас Хлоракас» және Словакияның «Кошице» командаларында ойнаған.
Айта кетейік, «Данди Юнайтед» Шотландия чемпионатын бір рет (1982–83), Шотландия кубогын екі рет (1994 және 2010), ал Шотландия лигасы кубогын екі рет (1979 және 1980) жеңіп алған.
