Қысқы Олимпиадаға барамын десеңіз: билет бағасы жарияланды

САТЫЛУ ЖҮЙЕСІ

Билеттер тек цифрлық форматта ұйымдастырылған. Ұйымдастыру комитеті ресми алаңдардың екеу ғана екенін атап өтті: Олимпиада ойындарының өз билет платформасы және Халықаралық Олимпиада комитетінің ресми серіктесі – On Location сайты.

Үшінші тарап сервистері немесе жеке делдалдар арқылы алынған билеттер жарысқа кіруге кепілдік бермейді және аренаға кіргізуден бас тартуға әкелуі мүмкін.

Жекелеген жарыстар мен салтанатты рәсімдерге билеттер ресми сайт арқылы сатылады. Қосымша қызметтерді қамтитын пакеттер тек On Location арқылы қолжетімді, басқа авторизацияланған платформалар жоқ.

ТІРКЕЛУ ЖӘНЕ САТЫЛУ ЕРЕЖЕСІ

Билет алу үшін міндетті түрде тіркелу қажет. Алғашқы кезеңде ең танымал жарыстарға қолжетімділік лотерея арқылы бөлінді, жеңімпаздарға төлем жасау үшін 48 сағаттық уақыт берілді. 2025 жылдың көктемінен бастап билеттер ашық сатылымға шықты. Паралимпиада ойындарына билеттер бөлек сатылып жатыр, олардың бағасы айтарлықтай төмен.

БИЛЕТ ҚҰНЫ

Ұйымдастыру комитетінің дерегіне сәйкес, баға саясаты жанкүйерлердің кең ауқымына бағытталған. Ең төменгі билет бағасы – 30 еуро (18 127 теңге, Қазақстан Республикасының Ұлттық банкінің 23 желтоқсандағы бағамы бойынша). Бұл сомаға, мысалы, хоккей турнирінің алдын ала матчтарына баруға болады.

• 20%-дан астам билеттер 40 еуродан (24 169 теңге) арзан;
• 57%-ы 100 еуроға (60 422 теңге) дейінгі бағада.

СПОРТ ТҮРЛЕРІ БОЙЫНША БАҒАЛАР

• Кёрлинг – 40–150 еуро (24 169 – 90 633 теңге)
• Биатлон – 50–200 еуро (30 211 – 120 844 теңге)
• Таулы шаңғы – 100–220 еуро (60 422 – 132 928 теңге)
• Конькимен жүгіру спорты – 180–280 еуро (108 760 – 169 182 теңге)
• Шорт-трек – 150–450 еуро (90 633 – 271 899 теңге)
• Фристайл және сноуборд – 50–440 еуро (30 211 – 265 857 теңге)