Халықаралық бокс қауымдастығы (IBA) Черногорияда өтіп жатқан жастар арасындағы әлем чемпионатының жүлде қорын жариялады, деп хабарлайды Ulyssport.kz.
2024 жылғы жастар арасындағы әлем чемпионаты 20 қазаннан 6 қарашаға дейін Будвада (Черногория) өтіп жатыр. Қазақстан бокс федерациясының баспасөз қызметінің мәліметі бойынша, турнирдің жүлде қоры 500 мың долларды (244 миллион теңге) құрайды.
Алтын медаль иегерлері 8 мың доллар (3,9 миллион теңге), күміс жүлдегерлер 4 мың доллар (1,95 миллион теңге), қола медаль иегерлері 2 мың доллар (978 мың теңге), ал ширек финалға шыққан спортшылар 1 мың доллар (489 мың теңге) алады.
Қазақстан құрамасынан 8 спортшы әлем чемпионатында медальдарға ие болды. Ерлер арасында жартылай финалға өткендер: Диас Берікбай (48 килограмм), Торехан Сабырхан (67 килограмм), Санжаралы Бегалиев (75 килограмм) және Расул Асанханов (92 килограмм).
Әйелдер арасында жартылай финалға шыққандар: Анель Абдрасилова (48 килограмм), Аружан Жанабаева (63 килограмм), Толғанай Қасымхан (60 килограмм) және Аружан Зейноллаева (81 килограмм).
Қазақстандықтардың жартылай финалға өтуі оларға осы турнирде кем дегенде қола медальдарды қамтамасыз етті.
