Украиналық даңқты боксшы Василий Ломаченко қолғабын шегеге ілді. Бұл туралы инсайдер Майкл Бенсон өзінің X-парақшасында мәлімдеді, деп хабарлайды Ulyssport.kz.
36 жастағы боксшы үлкен спорттан кеткісі келетінін бұған дейін де айтқан. Бұл жолы ақпаратты өз ресми растамаса да, Бенсон бұған ешкімнің күмәні болмауы керек дейді.
Ломаченко үш бірдей салмақ дәрежесінде бірнеше рет әлем чемпионы атанған. Біз оған алда істейтін барлық жұмысына тек сәттілік тілейміз, - деп жазды Бенсон.
Айта кету керек, украиналық боксшының мансабын аяқтайтынын Бенсон қазан айында болжаған еді. Ал, Ломаченконың бапкері Эгир Климас шілдеде берген сұхбатында шәкіртінің одан әрі жұдырықтасуға мотивациясы жоқ екенін айтқан болатын. Бірақ, мансабын аяқтау туралы тіс жарған жоқ.
Василий Ломаченко 2008 және 2012 жылдары Олимпиада чепионы атанды. Вэл Баркер кубогінің иегері. Әлемнің екі дүркін чемпионы. Ал, кәсіпқой бокста жартылай жеңіл, екінші жартылай жеңіл және жеңіл салмақта өнер көрсетіп, әрбірінде WBO нұсқасы бойынша әлем чемпионы атанған. Сонымен қатар, жеңіл салмақта WBA, IBF, The Ring және IBO нұсқалары бойынша да чемпиондық титулды еншіледі. 2023 жылдың мамыр айында ол абсолютті әлем чемпионы атағы үшін айқаста америкалық Дэвин Хейниден жеңілді. Десе де, сарапшылар бұл жекпе-жектің шешімі әділ болған жоқ дегенді жиі айтады.
