Бүгін Ролан Гаррос стадионында теннистен Париж Олимпиадасының жеребесі тартылды. Қазақстандық теннисшілердің бірінші айналымдағы қарсыластары белгілі болды, деп хабарлайды ulyssport.kz
Жекелей сында еліміздің бірінші ракеткасы Елена Рыбакина алғашқы айналымда Румыния теннисшісі Кристиан Жаклинмен ойнайды. Спортшылар бұған дейін 2 рет жолығып, әзірше 1:1 есебімен тең түсіп тұр.
Юлия Путинцева украиналық Марта Костюкпен шеберлік байқасады. Теннисшілер бұған дейін кездеспеген.
Ерлер арасында Қазақстанның бірінші, әлемнің 25-ракеткасы Александр Бублик жарысты АҚШ теннисшісі Тэйлор Фрицке қарсы матчпен бастаса, тағы бір отандасымыз Александр Шевченко Чехия спортшысы Якуб Меншикке қарсы ойнайды.
Жұптық сынның жеребесі:
Бублик/Недовесов (Қазақстан) – Попырин/Де Минаур (Аустралия)
Аралас жұптық сынның жеребесі:
Бублик/Рыбакина (Қазақстан) – Фриц/Гауфф
Жеребе рәсіміне қонақ ретінде түрлі Олимпиада жүлдегерлері, атап айтқанда Энди Маррей (Рио-2016, алтын), Рафаэль Надаль (Пекин-2008, алтын), Станислав Вавкринка (Пекин-2008, жұптық сында алтын), Элина Свитолина (Токио-2020, қола) және Анджелик Кербер (Рио-2016, күміс) қатысты.
Теннис ойындары 27 шілде мен 4 тамыз аралығында топырақ төсенішінде әйгілі Ролан Гаррос стадионында өтеді.
Ерік Ильясов Парижден арнайы ulyssport.kz үшін
