Үндістанда құрылған Тоғызқұмалақ федерациясы 2025 жылдың 3-5 қаңтар аралығында алғашқы чемпионатты өткізді, деп хабарлайды Ulyssport.
"Үндістанда Тоғызқұмалақ федерациясы ашылды. Сол кезден бері байланыстамыз. Оны Бхувнеш есімді жігіт ұйымдастырып жүр. Былтыр Әлихан Байменов, Бхувнеш және мен үшеуміз кездесіп, ақылдасып Үндістанда тоғызқұмалақты дамытамыз деп шештік. Соның нәтижесінде, ол қаңтардың басында Үндістанда тоғызқұмалақтан алғашқы ел чемпионатын бастап кетті.Үнді жастарын баулып жатыр." дейді мемлекеттік жаттықтырушы Дәулет Ұзаққалиұлы
ҮНДІСТАНДАҒЫ ТОҒЫЗҚҰМАЛАҚ ФЕДЕРАЦИЯСЫ
Біз Қазақстанның дәстүрлі зияткерлік ойыны тоғызқұмалақтан ұлттық чемпионатты жариялағанымызды мақтанышпен айтамыз. Бұл іс-шара қазақ елімен мәдени байланысты және біздің әлемдік аренада тоғызқұмалақтан топ жаруымызды дамыта түседі, делінген Үндістан Тоғызқұмалақ федерациясының фейсбук парақшасында.
ҚАЗАҚТЫҢ ТОҒЫЗҚҰМАЛАҒЫНА ҚЫЗЫҚҚАН ҮНДІ ЖІГІТ
Ulyssport ақпараттық порталы Бхувнешпен байлынысқа шықты.
Менің атым Бхувнеш. Әлихан Байменов мырза мені Үндістандағы Тоғызқұмалақтың жаһандық даму жөніндегі президенті етіп тағайындады.
ӘЛЕУМЕТТІК ЖЕЛІ АРҚЫЛЫ БІЛДІМ
Біріншіден, мен тоғызқұмалақты 2023 жылы Қазақстанда ұйымдастырылған Wolrd чемпионатының әлеуметтік желісіндегі жазбасынан көрдім. Соның арқасында, тоғызқұмалақты іздеп, зерттедім. Тоғызқұмалақ математика мен стратегияның үйлесімі. Ойынның бойындағы осы қасиет менің тоғызқұмалаққа деген құштарлығымды арттырды.
МАТЕМАТИКАЛЫҚ ҚЫРЫ ҮШІН ЕЛІМЕ ӘКЕЛДІМ
Қазіргі кезде балалар математиканы көп ұнатпайды. Ал, тоғызқұмалақ олардың математикалық дағдыларын жетілдірудің ең жақсы тәсілі, өйткені мұндағы бір бұрыс қадам жеңісті жеңіліске айналдыруы мүмкін.Сондықтан тоғызқұмалақты өз еліме әкелдім. Әлемдік Тоғызқұмалақ Федерациясына хабарласып, 2023 жылдың қазан айында Әлихан Мырзамен сол мәселе бойынша кездестім. Осыдан кейін мен 2024 жылдың қаңтарында жастар арасында кішігірім чемпионат өткіздім.
ҰЛТТЫҚ ЧЕМПИОНАТҚА 150 АДАМ ҚАТЫСТЫ
Содан барып, 2025 жылдың 3-5 қаңтары аралығында алғаш рет Ұлттық Чемпионат ұйымдастырдым, оған 150-ден астам адам қатысты. Үндістан халқы осы арқылы бұл ойынды қатты ұнататынын көрсетті. Еліміздің түкпір-түкпірінен 15 аймақтан адамдар келді. Барлығы тоғызқұмалақ ойынының ұйымдастырылғанына қуанышты екенін жеткізді. Оқушылар мен жас ұрпақ бойына осы ойынды сіңіру үшін түрлі турнирлер өткізуді ұсынды.
Еске сала кетейік, бұған дейін Литвада Тоғызқұмалақ федерациясы құрылған болатын.
