Алматыдан Антальяға ұшып бара жатып, шұғыл түрде Ақтауға қонған ұшақта ҚПЛ-дың "Жетісу" командасы отырғаны белгілі болды, деп хабарлайды Ulyssport.kz Meta-ratings.kz-ке сілтеме жасап.
«Жетісу» ФК мінген Airbus A321 ұшағы Ақтау әуежайына қонуға мәжбүр болды, деп жазды Meta-ratings.kz.
Еске сала кетсек, 8 қаңтарда Алматы - Анталья бағыты бойынша КС915 рейсін орындайтын Airbus A321 ұшағы әуежайдан жергілікті уақыт бойынша 08: 35-те ұшып кетті.
МӘН-ЖАЙ
Техникалық себеппен ұшақ Ақтау әуежайына штаттық режимде қонды. Бұған орталық бактың отын жүйесінің сақтандырғыш клапанының ақаулығы себеп болды. Рейс Алматыдан қосалқы бөлікті жеткізу қажеттілігіне байланысты 9 қаңтарда сағат 09: 20-ға ауыстырылды. Жолаушыларға тамақ беріліп, қонақ үйге орналастырылды. Осындай шаралар Антальядағы жолаушыларға қатысты да қолданылып жатыр.
БҰҒАН ДЕЙІН
Ауа райының нашарлауына байланысты Алматы әуежайына қонуы керек рейстер кейінге ауыстырылып жатқаны хабарланған еді.
Алматы халықаралық әуежайы 8 қаңтарда қолайсыз метеорологиялық жағдайларға байланысты (қар жауу және тұман) кейбір ұшып кету рейстерінің кейінгі уақытқа ауыстырылғанын хабарлады.
РЕЙСІН КҮТІП ОТЫРҒАНДАРҒА ЖАҒДАЙ ЖАСАЛДЫ МА
Кешігулерді азайту және жолаушыларға жайлы жағдай жасау үшін әуежай мен әуе компаниялары бірлесе жұмыс істеп, күту залдарында ыстық тамақ, жеңіл тағамдар және сусындар ұйымдастырды.
Ұшу қауіпсіздігін қамтамасыз ету мақсатында ұшақтарға мұзға қарсы өңдеу жұмыстары Қазақстанның ұлттық заңнамасының талаптарына, сондай-ақ FAA (АҚШ Азаматтық авиация федералды басқармасы) мен Канада Көлік министрлігінің ұсынымдарына сәйкес жүргізіліп жатыр.
- Барлық әуежай қызметтері күшейтілген режимде жұмыс істеуде. Әуежайдың немесе әуе компанияларының ресми парақшаларынан рейстердің ағымдағы статусын алдын ала тексерулерін ұсынамыз. Түсіністік танытқандарыңыз үшін алғысымызды білдіреміз, дейді Алматы халықаралық әуежайының корпоративтік коммуникациялар департаментіндегілер.
АСТАНА
Бұған дейін Астана әуежайында да 8 рейс кешіктіріліп жатқаны хабарланған еді. Алматы, Атырау және Шымкентке ұшатын кейбір әуе рейстері кейінге қалдырылды.
Рейс туралы ақпаратты Астана әуежайының сайтынан білуге болады.
