Қазақстандық теннисші Елена Рыбакина Римдегі турнирдің үшінші айналымына шықты, деп хабарлайды Ulyssport.
Рыбакина турнирдің екінші айналымында, яғни өзінің алғашқы матчында WTA рейтингінде 63-орында тұрған неміс теннисшісі Ева Листі 7:6 (7:3), 6:2 есебімен жеңді. Кездесу 1 сағат 25 минутқа созылды.
Алғашқы сет оңайға соқпады: қарсыластар бір деңгейде ойнап, партия тағдыры тай-брейкте шешілді. Рыбакина бұл кезеңде барынша қарқын қосып, сетті мінсіз аяқтады.
Екінші сетте қазақстандық теннисші бастан-ақ басымдықты өз қолына алып, матчты сенімді жеңіспен аяқтады.
Үшінші айналымда Елена канадалық Бьянка Андреескумен ойнайды. Бұл матч ертеңге жоспарланған.
