Нью-Йоркте өтіп жатқан US OPEN турнирінің екінші айналымында отандасымыз Елена Рыбакина ойнамайтын болды, деп хабарлайды ulyssport.kz
Бүгін, яғни 29 тамыз US OPEN турнирінің екінші айналымдық матчтары өтіп жатыр. Қазақстанның бірінші, әлемнің төртінші ракеткасы Елена Рыбакина француз спортшысы Джессика Поншеге қарсы ойнауы тиіс болатын. Алайда кездесуге бір сағат қалғанда ұйымдастырушылар Рыбакинаның кортқа шығудан бас тартқаны туралы хабарлады.
Өкінішке орай жарақаттарыма байланысты бас тартуға мәжбүр болдым. Сезонның соңғы “Үлкен дулыға” турнирін осылай аяқтағым келмеді, бірақ ағзамды тыңдауым керек болды. Жыл соңындағы жарыстарды сәтті өткіземін деп ойлаймын. Мені қолдаған және қолдап жатқан барлық жанкүйерлеріме алғыс білдіремін. Ал қалған ойыншыларға сәттілік! – деп мәлімдеме жасады Елена Рыбакина.
Айта кетейік, бұл қазақстандық теннисшінің бірінші рет ойыннан бас тартуы емес. 2022 Уимблдон чемпионы биылғы сезонды үш титулмен өте жақсы бастаған. Сосын Доха мен Майами мастерстерінің финалында ойнады. Алайда денсаулығына байланысты бірнеше турнирден бас тартты. Атап айтсақ, Дубай, Индиан Уэллс, Рим, Канада мастерстері және Париж Олимпиадасы.
АҚШ ашық біріншілігінің жекелей сынында тағы бір спортшымыз Путинцева жарысты жалғастыруда. Юлия бүгін қытай теннисшісі Ван Синьюйды жеңіп, үшінші айналымға жолдама алды.
