Швейцарияның Ньон қаласында 17 жасқа дейінгі жасөспірімдер арасында 2025/26 жылғы Еуропа чемпионаты бірінші іріктеу сатысының жеребесі тартылды, деп хабарлайды Ulyssport.kz.
Жеребе нәтижесінде қазақстандық жасөспірім футболшылар сегізінші топқа түсті. Қарсыластары — Хорватия, Нидерланд және Албания. Ойындар 2025 жылдың 1 шілдесі мен 18 қараша аралығында өтеді.
Алғашқы іріктеу сатысында әрбір топтың жеңімпазы мен екінші орын алған командалар А лигасы жолдама алады. Ал қалған 26 құрама В лигасы екінші іріктеу сатысында бақ сынайды.
Құрлықтық доданың финалдық турнирі Эстонияда өтеді.
Сондай-ақ 19 жасқа дейінгі жастар арасында 2025/26 жылғы Еуропа чемпионаты іріктеу сатысында Қазақстан құрамасы бірінші топта Ирландия, Нидерланд және Кипрмен шеберлік байқасады.
Ойындар 1-18 қараша аралығында болады. Әрбір топтан алғашқы екі орындағы және үшінші орындағы үздік нәтижеге қол жеткізген құрамалар 2026 жылдың көктемінде Испанияда элиталық сатысында сынға түседі. Одан үздік атанған жеті құрама мен Уэльс финалдық сатысында жүлдені сарапқа салады.
2034 жылғы әлем чемпионатының финалы Эр-Риядта өтетінін айта кетейік.
