Отандасымыз Данияр Елеусінов дәл қазір кез келген чемпионмен рингке шыға алатынын айтып, батыл мәлімдеме жасады, деп хабарлайды, Ulyssport.kz.
Қазақстандық боксшы Данияр Елеусінов (12-0, 7 КО) өзін жартылай орта салмақтағы әлем чемпиондарымен салыстырды.
«Менеджерлеріммен қателіктер болғаны рас. Бірақ шын мәнінде дәл қазір мен ешбір әлем чемпионынан кем емеспін. Кез келген танымал боксшыны алсақ та. Тек олар көбірек танымал, бар-жоғы сол. Егер шаршы алаңға шығатын болса, онда олар оп-оңай... Керісінше, мен оларды жеңіп аламын. Өз-өзіме сенімдімін, себебі олардың қандай екенін көрдім. Қазір кез келгенін айқасқа шақырар едім. Күшім де, тәжірибем де жеткілікті. Кроуфорд болсын, Эннис болсын... Қай-қайсысымен де жұдырықтасуға дайынмын», деді Елеусінов.
Еске сала кетсек, кәсіпқой боксшы Данияр Елеусінов бұған дейін жартылай орта салмақта IBO нұсқасы бойынша әлем чемпионы атанған. Ал, әуесқой бокста ол 2016 жылы Рио Олимпиадасының жеңімпазы атанған.
