Туризм және спорт министрі Ербол Мырзабосынов Әмин Тұяқовтың жүлдесіне арналған халықаралық турнир өткізілетінін хабарлады, деп жазады деп хабарлайды Ulyssport.kz.
Спорт министрі жуырда Қазақстан жеңіл атлетика федерациясының президенті болып сайланған даңқты спортшы, Лондон Олимпиадасының чемпионы Ольга Рыпаковамен кездесіп, елордада өтетін Әмин Тұяқовтың жүлдесіне арналған халықаралық турнир жөнінде пікір алмасқан.
Әмин Елемесұлы Тұяқов Қазақстан жеңіл атлетикасы тарихындағы айтулы тұлға. Өз дәуірінде КСРО чемпионаттарының жеңімпазы және жүлдегері, КСРО рекордсмені, Еуропа кубогінің иегері, Еуропа чемпионатының жүлдегері атанған. Сонымен қатар КСРО еңбек сіңірген спорт шебері, Қазақ КСР еңбек сіңірген жаттықтырушысы.
Мырзабосыновтың айтуынша, халықаралық жеңіл атлетика федерациясының күнтізбесіне енген турнир 2025 жылғы World Athletics Indoor Tour Gold сериясы аясындағы алғашқы жарыс болмақ.
Мұндай турнир тек біздің елде ғана емес, әлемнің тоғыз қаласында да ұйымдастырылады. Бәсі биік бәсекенің елордамыздан бастау алуы халықаралық ұйымның бізге деген сенімін көрсетеді. Турнирге әлемдік жеңіл атлетика жұлдыздары қатысады. Олардың қатарында Олимпиада және әлем чемпиондары мен жүлдегерлері бар. Біз осындай халықаралық жарыстарды елімізде өткізу арқылы жергілікті жеңіл атлеттердің біліктілігін арттыруға, шеберлігін шыңдауға мүмкіндік аламыз, – дейді ол.