Евгений Кошкин – халықаралық жарыстарда есімі жиі аталып жүрген спортшы. Қазақстандық конькимен жүгірушінің соңғы нәтижелері көпшілікті таңғалдырды. Ол олимпиадалық маусым алдында өз шеберлігін дәлелдей білді. Алайда, алда оны ең маңызды сынақтардың бірі күтіп тұр, деп хабарлайды Ulyssport Olympic.kz-ке сілтеме жасап.
Бұған дейін Кошкинді болашағынан үміт күттіретін спортшылардың қатарына жатқызатын, бірақ оны әлемдік медальдарға басты үміткер деп атағандар аз еді. Ал қазір ол жай ғана дарынды спортшы емес, нағыз мықтылардың қатарына қосылған үздік конькишілердің бірі. Ол бұл деңгейге сенімді әрі жарқын жеңістері арқылы жетті. Кошкиннің Әлем кубогының соңғы кезеңдеріндегі өнері әлемдік деңгейдегі конькишілермен тең дәрежеде бәсекелесе алатынын көрсетті.
Егер оның спорттық мансабындағы кезеңдерді салыстыратын болсақ, Евгений барлық қырынан айтарлықтай дамыды. Ол әлемдегі ең мықты екпін алатын конькишілердің бірі саналады, бұл туралы ұлттық құраманың бас бапкері Александр Панфилов бірнеше рет айтқан болатын. Алайда осы маусымға дейін Кошкинге әлемдік аренаның ең ірі жарыстарында жүлдеге ілігу үшін бір қадам жетіспейтін.
Биыл бәрі өзгерді. Ең алдымен, Кошкин денсаулығы сыр бергеніне қарамастан, 2025 жылғы Азия ойындарында күміс медаль жеңіп алды. Кейін Әлем кубогының екі кезеңінде қатарынан екі алтын және бір қола жүлде иеленді. Бұл жерде оның жолы болды деп айту қиын.
Әлем кубогының деңгейі өте жоғары. Мұнда жалпы есепте көш бастап тұрған, АҚШ-тың үздік конькишісі Джордан Штольц, Олимпиада чемпионы Гао Тинъюй (Кошкин Харбинде дәл осы спортшыға есе жіберді), Олимпиада жүлдегерлері Лоран Дюбрей (Канада), Ватару Морисиге (Жапония), Юн Хо Ким (Оңтүстік Корея), атақты Еннинг Де Боо (Нидерланд) және басқа да мықты спортшылар бар.
Яғни, ол барлық жүлдесін лайықты түрде жеңіп алды. Бір ғана жүлдені кездейсоқ деп санауға болады, нақтырақ айтсақ қола медальді. Бірақ қатарынан үш жүлде, оның ішінде екі алтын – бұл ілгері даму мен тұрақтылықтың дәлелі.
Кошкин Әлем кубогының әр кезеңінде уақытын жақсартып келеді. Польшада ол 34.52 секунд, ал Нидерландта 34.46 секунд нәтижесін көрсетті. Бұл көрсеткішпен ол Бейжің Олимпиадасында үшінші орын алатын еді. Ал спортшының қазіргі даму қарқынын ескерсек, ол қазірдің өзінде көшбасшыларды артта қалдырып, 2026 жылғы Олимпиада жүлдесіне нақты үміткер болып отыр.
Оның табысы – бірнеше жағдайдың үйлесімділігінің нәтижесі. Ең алдымен, ұлттық құрама дамып келеді. Біршама өзгеріс оң нәтижесін берді. Мысалы, командаға жас бапкерлерді шақыру үлкен пайдасын тигізді. Сонымен қатар ішкі бәсекелестік те күшейді. Мысалы, Алтай Жардембекұлы ел чемпионатында Кошкиннен басым түскен болатын.
Жеңістің тағы бір маңызды бөлігі – командадағы кәсіби механиктердің жұмысы. Соңғы бірнеше жылда олар өз ісінің нағыз маманына айналды. Сонымен қатар құраманың медициналық тобы да жоғары деңгейде жұмыс істейді. Әсіресе, жарысқа қатысатын кезеңде спортшылардың жедел қалыпқа келуі өте маңызды.
Әрине, Кошкиннің өзінің дарыны да негізгі рөл атқарды. Бапкерлер штабы оның әрқашан жоғары әлеуетке ие екендігін айтады. Ол мұны жасөспірімдер кезеңінде-ақ дәлелдеген. Еңбекқорлық пен осы іске жан-тәнімен берілуі оның нағыз жұлдызға айналуына сеп болды.
Енді Миландағы Олимпиада ойындарына дейін Евгенийді басты сынақ күтіп тұр. Ол 3-16 наурыз аралығында Норвегияның Хамар қаласында өтетін әлем чемпионаты. Соңғы екі Әлем кубогының кезеңінде Кошкин 500 метрлік қашықтықта көшбасшылық үшін күрестің бағытын түбегейлі өзгертіп жіберді. Енді ол әлем чемпионатына алтынға үміткер ретінде аттанады.
Спортшы физикалық жағынан жоғары әлеуетке ие. Ендігі басты сұрақ – Кошкин психологиялық қысымға қалай төтеп береді? Бірақ соңғы жарыстарда оның Олимпиада жүлдегерлерімен сенімді түрде бәсекелескенін ескерсек, алаңдауға негіз жоқ.