Түркістан облысының дене шынықтыру және спорт басқармасының басшысы тағайындалды

Дастан Кенжалин

ҚР Туризм және спорт министрлігі Түркістан облысының дене шынықтыру және спорт басқармасының басшылығына үміткердің кандидатурасына келісім берді, деп хабарлайды Ulyssport.

gov.kz

Қазақстан Республикасы Туризм және спорт министрлігі жанындағы өңірлік спорт басқармаларының басшыларын тағайындау жөніндегі комиссияның кезекті отырысы өтті. Жиында Түркістан облысының дене шынықтыру және спорт басқармасының басшысы лауазымына ұсынылған кандидатура қаралды.

Талқылау қорытындысы бойынша комиссия мүшелері Түркістан облысы дене шынықтыру және спорт басқармасы «Орталық су-спорт кешенінің» МКҚК-нің директоры Ғалымжан Батырханұлы Худияровтың кандидатурасына келісім берді. 

Үміткердің спорт саласындағы кәсіби тәжірибесі, басқарушылық қабілеті және өңірдегі спортты дамытуға қатысты ұстанымы комиссия тарапынан жан-жақты зерделеніп, оң шешім қабылданды.

Кандидаттарды жергілікті атқарушы органдар ұсынады, ал тағайындау тек ҚР Туризм және спорт министрлігі жанындағы комиссияның мақұлдауынан кейін жүзеге асырылады.