Қазақстандық әуесқой боксшы Дулат Бекбауов ресми түрде екі жылға жарыстардан шеттетілді. Бұл шешім оның антидопинг талаптарын бұзғанына байланысты қабылданды, деп хабарлайды Ulysmedia.kz.
ХАЛЫҚАРАЛЫҚ ШЕШІМ
Халықаралық тестілеу агенттігі (International Testing Agency – ITA), Халықаралық бокс қауымдастығының (International Boxing Association – IBA) атынан әрекет етіп, Бекбауовқа қатысты санкциялар енгізілгенін хабарлады. Спортшы IBA Anti-Doping Rules (ADR) ережесінің 2.4-бабына сәйкес кінәлі деп танылды. Себебі ол 12 ай ішінде үш рет орналасу орнын көрсету талабын бұзған.
СПОРТШЫНЫҢ ЖАУАБЫ
Белгілі болғандай, Бекбауов тағылған айыптарды жоққа шығарған жоқ. IBA ADR ережесінің 8.3.3-бабына сәйкес, ITA екі жылдық дисквалификация мерзімін бекітті: 2025 жылдың 18 қарашасынан бастап 2027 жылдың 17 қарашасына дейін. Сонымен қатар, 2025 жылдың 1 қаңтарынан кейінгі барлық жеке нәтижелері күшін жойды.
ШАҒЫМ ЖОЛЫ
Бұл шешім Спорттық арбитраж сотының (Court of Arbitration for Sport – CAS) апелляциялық бөлімінде IBA ADR ережесінің 13.2.3-бабына сәйкес шағымдануға болады. ITA қазіргі жағдайға қатысты қосымша түсініктеме бермейтінін мәлімдеді.