Қазақстандық боксшы Дулат Бекбауов Чиангмайда (Таиланд) өтіп жатқан бокстан Азия чемпионатында жартылай финалдық кездесуін өткізді, деп хабарлайды Ulyssport.kz.
67 кг салмақ дәрежесінде сынға түсетін Дулат Бекбауов жартылай финалда Тәжікстан спортшысы Шукрат Саломатовпен кездесті. Бұл жекпе-жекте қазақ боксшысы төрешілердің бірыңғай шешімімен жеңіске жетті (5:0).
Айта кетсек, Дулат Бекбауов Азия чемпионатының 1/8 финалында тайбэйлік Джиа-Джун Чиуан Вангтан басым түскен еді. Кейін ширек финалда малайзиялық Арифф Айман Мухаммадты мерзімінен бұрын жеңді.
Ал бұған дейін Қазақстан ерлер құрамасынан 3 боксшы Азия біріншілігінің финалына жолдама алды. Атап айтқанда, Санжар Тәшкенбай, Махмұд Сабырхан, Оразбек Асылқұлов алтын жүлдеге таласады.
Еске сала кетсек, Бекбауов 2023 жылғы әлем чемпионатының және 2022 жылғы Азия чемпионатының күміс жүлдегері.